(1)
يا حاجة ستونة
جهدية يوم جونا
كان شفتي “مريومة”
مرميه مغبونه
دقوها
دقونا
في حتة مركونه
جواها معجونه
بي مويه من الله
جات نازله زي مطره
والمطره محزونة
(2)
يا حاجة ستونة
أدونا
أدونا
أدونا فندقكم
ندق ونديكم
تدقوا تدونا
تدونا ليمونة
نمص ونديكم
تمصوا تدونا
قرفنا
قرفونا
والله قرفونا
(3)
يا حاجه ستونة
جهديه يوم جونا
ستفنا سدونا
سددنا مرقونا
يا حاجه زازونا
حجينا بالنقاط
نقطنا ما نسونا
في حلة اللقاط
والكمبو كمبونا
بالنقطة عدونا
بالشولة شدونا
شرونا، فرونا
فرونا، لمونا
في الجابره ختونا
والكمبو كمبونا
(4)
جهدية يوم جونا
يا حاجة ستونة
كبرنا كبونا
في لمحة ودونا
في الترعة كبونا
كبونا بي سرعة
يا ترعة دمك زاد
زاد البلد كفوات
لموها زي الفات
تخزين لجان “القات”
أدي الظليم إفلات
غتغت علي الفاتن
وشجع علي الجايات
(5)
الموز أبو نقطات
نقط علينا الدم
شرانا في البلدات
طول علينا الليل
ليل الحزن يا “نبيل”
ليلا طويل بلحيل
كم جانا بالغفلات
طمن وأنعش ديل
ناس الضبح والشيل
البرموا في الترعات
شيل الحزن يا ليل
شيلي الوزر يا لجان
شيلي الوزر طابقين
ما فيش شهيدا مات
ولا دم شهيدا راح
(6)
جهدية يوم جونا
يا السني “ود مدني”
يا حليله “ود مدني”
“ود مدني” معيونه
والجاته في الآخر
تختاها في عيونه
عيون الجمال “مدني”
وسر الهوي عيونه
(7)
“ود مدني” يا السني
يا السني “ود مدني”
جهدية يوم جونا
يا السني صفونا
صفونا بالفردي
بالسونكي ضبحونا
ضبحونا بالدغري
هللنا هدونه
هدونه في الكبري
بالطلقة أدونا
حتونا كالقمري
في المويه فكونا
فكونا كان تدري
يالسني فكونا
من فوق علي الكبري
والكمبو كمبونا
يا حاجة ستونة
ما الكمبو كمبونا
الجميل الفاضل
أوغندا / يناير / 2025
