فاجأني صديقي الغالي الصحفي احمد نصر قبل ايام بي اعجب سؤال ََ..
انت يا هلاوي بتقول .. انا يا
غرامي وصلت بيك .. في الدنيا لي حد الغرام .. انا داير اعرف حد الغرام ده وين ..
ضحكتا وقلت لي والله يا احمد
يا اخوي انا ذاتي ما عارف ..
قال لي انا قبل كده سألت مصطفي سيد أحمد الله يرحمو
قال لي اسأل صاحبك هلاوي ..
بعد كلام اخوي احمد قعدت افكر لأول مر وانا بعيد وبستعيد الذكريات الصادقه ونبيله ..
واسأل نفسي .. صحي حد الغرام ده َووين يا نفسي ..
تعرف يا احمد يا اخوي لما تلاقي ليك انسان في الدنيا
دي .. أول حاجه يعملا معاك يمسكك من ايديك ويمشي بيك مصلحة الإحصا .. يحرر ليك شهادة ميلاد جديده بي تاريخ
ومكان سكن جديد ..
لو عاينت في المرايه تحس بي
انك زول تاني ..
انسان تحس بي لي اول مره حررك.. رفع علمك وعمل ليك نشيد قومي ..
انسان لما تشوفو بتعتدل حالة
الطقس وامكن تنزل جواك مطره .. حصل لاقيت انسان
بشرق فيك شمس .. يشطب
كل تواريخك ويكتب تاريخ وجودو هو في حياتك .. انسان
عندو امكانية يغير فصيلة دمك
ويسكن بين رمشك وعينك .. ويقدل في شراينك..
بي لغه تانيه .. تعرف لما تلاقي انسان بيعرف كيف يحاور كل
كل دفاعاتك وينفرد بي قلبك
.. وفجأه تلقى قلبك واقع في
زاويه وانت في الزاويه التانيه
لما قلبك يمسك راسو ويقول ياربي دي دخلت بي وين ..
ده حد الغرام يا احمد .. وتعرف
يا احمد لما تلاقي انسان زي ما
قال الكاشف غصبا عنك يلفت
نظرك .. مهما تحاول تاخد حذرك .. انسان تخاف عليهو من النسمه وتدسو من عيون
الناس .. برضو تلقى الناس شافتو في عيونك ..
تعرف لما يكون في انسان في حياتك تشيل حروف اسمو تمشي بره البلد تشرك بيها للطير والقمري ََ.. لما تلقي
انسان انت عارف نقطة ضعفو
.. وهو عارف نقطة ضعفك والاتنين عارفين كيف يكون الضعف في الريده قوه .. انسان انت عارف سرو .. وهو عارف سرك .. ويطويك زي سعفة نخيل بين ايديهو ويفرك ..
لما تلقي انسان يعمل فيك الدايرو كلو .. غلط صاح انت
تبصم .. نظام تغلطو انتو يا احباب .. نجيكم نحن بي الأعذار
َ.. او زي ماقال عكير الدامر ..
هو يسوي الغلط .. وأنا سوي كتر خيرو ..
انسان لما يجرح قلبك انت بتدس دموعك وتزرع مكان
الجرح ورده .. اصلا اصلا ما
بتعاتبو ولا بتلومو ..
كل البتقدر على تقول لي ..
يا حلو السكوت .. مرات كلام
.. وعدم الملام ..
هو كمان ملام .. ياسلام عليك
ويا سلام….
ملحوظه ..
حليل الناس الكان بصلو حد
الغرام .. هسه خطوه والتانيه
يجي الواحد راجع ونفسو قايم
ويقول ليك ..
.. انا كنت مالي ومال كده ..
… عبدالوهاب هلاوي
