الخرطوم _ ترياق نيوز
تغزل الصحفي عمار محمد ادم شعرا على صفحته ب فيس بوك في الصحفية لينا يعقوب مدير مكتب قناة العربية بالخرطوم ..
ووضع صورتها التالية على صفحته
نص القصيدة ادناه :
يالينا يا اقع البحر
شعر عمار محمد ادم
الشعر جاني مع الفجر
والله كان حالي حال
مصلايتي في إيدي اليمين
ومسبحتي في ايدي الشمال
وفي البدء ازجيها السلام
مااصلو جفني انا صاحي ومابينام
قتليها يالينا الجمال
أتقبلي مني الكلام
كون اني شايقي من ناسا فصاح
يا انتي يا الموزونة صاح
يانسمة هبت في الصباح
عمقتي في قلبي الجراح
والحسرة والحب والنواح
ملك الفؤاد حبي العتيق
بي رؤيتي وفهمي العميق
اللوعة شبت والحريق
الحب فتفت للحجار
والبفهمو الحب ما كتار
جوة الفؤاد طلقوها نار
عماروقع مصدوم عديل
شايلني شيل
وقريت سورة قاف ونون
واديتها من سري التقيل
ورغم التباريح والالم
بعطر الجو بالنشيد
بالعالم الحر السعيد
في مستهل عاما جديد
تأتي المعاني واصلحها
بنظم قوافي واسمحها
مهدود وماقادر اقوم
حيران ومن فوقي الوجوم
مهموم وفي الطرقات احوم
نفس المحب متصبرة
والحب دفن في المقبرة
ريحة الكتب والمحبرة
اركب قطر من عطبرة
هبت هبوب ريح الشمال
يالينا يا كل الجمال
وانا في البلد لافيلي شال
قالولي تب يازول محال
وبديت انده لي رجال
وكتار شيوخي وماقلال
شال السحاب وكب المطر
قامت حرب والحال خطر
هدمت المدارس والبيوت
بي همة ثابتين الشفوت
بهوي الجمال انا وانجلد
فيها الجمال ماليهو ند
لينا الغرام المستحيل
يلرايعة يااجمل جميل
الحب سهام تخطي وتصيب
وكل المشاعر تستجيب
والحلم كالغصن الرطيب
داعب خيال زولا وفي
وفرحت من دل الحبيب
صب السماء مطرا غزير
مالينا منبع كل خير
(ماترجع السيف الجفير
والدنيا فايري مصادمة)
هاجت مشاعري وتشتبك
عايش ممحن ومرتبك
مالينا في البال والعيون
أن كنا لابد ان نكون
عادي المحبة بتنتصر
واكتبلك الليلة الشعر
بي قلم الرصاص او بالحبر
يالينا عمار انضرب
في حبك اتجلي وودر
اتغطي بي ورق الشدر
يانغمة من أجمل وتر
العطر فاح طيبو انتشر
واقول برآي
يالينا يا أقع البحر
ياناس محب لينا انتحر
